Чилидеги токой өртүнөн жүздөн ашык адам көз жумганы, 1100 үй кыйрап калганы кабарланды. Өлкөнүн президенти Габриэль Борич улуттук телекөрсөтүү аркылуу жарандарга кайрылып, өрттүн жайылышына каршы күрөшүп жаткан куткаруучулар менен кызматташууга чакырды. Президент өрт тез жайылып жатканын, климаттык шарттар, жогорку температура, катуу шамал жана төмөнкү нымдуулук тилсиз жоону көзөмөлдөөнү кыйындатып жатканын билдирди.
Өлкөнүн түштүгүндө ушул аптада жогорку температура болуп, 92 токой өртү катталган. Эң оор абал Вальпараисо аймагында. Ал жерде тургундарга тез арада үйлөрүн таштап кетүү жагы эскертилген. Ички иштер министрлигинин башчысы төрт оорукананы жана үч карылар үйүн эвакуациялоого туура келгенин, эки автобекет күйүп кеткенин билдирди. Мамлекет башчысы Вальпараисодо өзгөчө кырдаал киргизилгенин жарыялады.
