Баткендеги төрт көчө боюнча Адахан Мадумаров кол койду делген протоколго Өмүрбек Текебаев макул эмес экендигин билдирди. Ал Кыргызстандын кызыкчылыгына төп келбегени үчүн апрель төңкөрүшүнөн кийин парламент колдобой койгонун айтты. “Ар кандай саясий чечимдер болот. Анын этаптары болот. Эгер ал туура эмес деп эсептелинсе, парламент же, президент кабыл албай коёт. Ошону менен ал тарых жабылышы керек. Эл аралык өнөктөштөргө чечимдин жокко чыккандыгына байланыштуу кабар жөнөтүлүшү керек”,- деп билдирди саясатчы. “Адахан Мадумаровду мурдагы президенттер Алмазбек Атамбаев менен Роза Отунбаева күнөөлөгөн эмес. Сооронбай Жээнбеков менен Садыр Жапаров күнөөлөп жатат. Бирок, кол койду делген протокол жокко чыкты деп Тажикстанга билдириле элек. Эмомали Рахмонго расмий түрдө айтып коюшубуз керек да. Эмне, күчүбүз Мадумаровго эле жетеби?” – деди Өмүрбек Текебаев.
