Жогорку Кеңештин айрым депутаттарынын Белоруссияга болгон расмий иш-сапары чуу менен коштолду. Төрага Нурлан Шакиев, “Ата-Журт Кыргызстан” фракциясынын лидери Бакыт Үсөнов жана Элмурза Сатыбалдиевдин бозгунда жүргөн экс-президент Курманбек Бакиев менен жолугушканы тууралуу маалыматтар тарады. Жогорку Кеңештин маалымат кызматы билдирүү таратып, төраганын андай жолугушуусу болбогонуна басым жасады. Бирок, коомчулук Нурлан Шакиевдин бир кезде Курманбек Бакиевдин жардамчысы экенин эске алып, анын бозгундагы экс-президент менен жолугушканын божомолдошууда.
Ал эми кечээ депутат Элмурза Сатыбалдиев “Бакиев менен жолукканым чын. Ал менин президентим болгон. Аны менен иштешкемин. Булар таза инсандык гана мамиле. Аны көргүм, салам айткым келди. Биз күнүмдүк нерселер жөнүндө гана сүйлөштүк. Саясат эмес…”,- деди.
