Бүгүн, 15-декабрда Бишкектеги Токтогул Сатылганов атындагы улуттук филармонияда экинчи Элдик курултай өтүп жатат.
Учурда аймактардан шайланып келген делегаттар жарыш сөзгө чыгып, ой-сунуштарын айтышууда.
Курултайда тууну өзгөртүү тууралуу мыйзам долбооруна байланыштуу маселе көтөрүлдү. Баткен шаарынан келген делегат Жумабек Абдипатта уулу коомчулукта тууну өзгөртүү демилгеси боюнча кызуу талкуу уланып жатканын белгиледи.
“Туу жөнүндө 1-2 ооз сөз айтып коеюн. Туу 1992-жылы кабыл алынган жылдан бери ар кандай талкуулар болуп “бул күндүн нурубу же күн карамабы” деген ойлор айтылып келген. Жогорку Кеңеш бул маселени терең изилдеп чечим кабыл алат деп ишенем”, – деди.
Белгилей кетсек, Кыргызстандын мамлекеттик туусу өлкө эгемендик алгандан кийинки алгачкы парламенттин 1992-жылдын 3-мартындагы токтому менен бекитилген.
