Министрлер кабинеттинин төрагасынын орун басары Эдил Байсалов бүгүн, 13 сентябрда парламенттин жалпы жыйынында депутаттардан кечирим сурады.
“Урматтуу депутаттар, мен эч качан депутаттар элдин атынан сүйлөй албайт деген эмесмин, видео бурмаланган. Мен дагы бир жолу сиздерден кечирим сурайм”,- деди Эдил Байсалов. Бирок, төрага Нурлан Шакиев “сиз кете бериңиз”,- деди.
Депутат Кундузбек Сулайманов “сиз алгач парламентке келээрде кечирим сурасаңыз болмок. Жаңы министрлерди сунуштаганга келбей”,- деди эле, Төрага ага “урматтуу депутаттар түшүнсөңүздөр, жаңы министрлерди президенттин Жогорку Кеңештеги өкүлү сунуштайт. Эдил Байсалов аларды сунуштаганга келген жок”,- деп билдирди.
Эске салсак, Жогорку Кеңеш июнь айында Байсаловду кызматтан алуу сунушун президентке жөнөтүү тууралуу токтом кабыл алган. Парламенттеги “Ишеним”, “Ата Журт-Кыргызстан” фракциялары жана “Мекенчил” депутаттык тобу анын отставкасын кароо демилгесин көтөргөн.
