Бүгүн, 13-майда Ысык-Көл облусунун Чолпон-Ата шаарынын ат майданында ШКУнун “Run the Silk Road” эл аралык марафону старт алды. Бул тууралуу Дене тарбия жана спорт департаментинен билдиришти.
Маалыматка ылайык, Ысык-Көл марафонунун салтанаттуу ачылыш аземине министрлер кабинетинин төрагасынын орун басары Эдиль Байсалов жана ШКУнун башкы катчысы Чжан Мин катышты.
Спорттук иш-чаранын алкагында марафон (42 км 195 м), жарым марафон (21 км 97 м), 10 км, 3 км аралыктарында жана скандинавиялык басуу боюнча жарыштар өтүүдө. Жалпы байге фонду 1 млн 534 миң сомду түзөт.
42 км
1-орун — 200 миң сом;
2-орун — 140 миң сом;
3-орун — 100 миң сом;
4-орун — 70 миң сом;
5-орун — 50 миң сом;
6-орун — 20 миң сом.
21 км
1-орун — 70 миң сом;
2-орун — 50 миң сом;
3-орун — 30 миң сом;
4-орун — 20 миң сом;
5-орун — 10 миң сом;
6-орун — 7 миң сом.
Эске салсак, аталган марафон ШКУнун эгидасы алдында 2019-жылдан бери өткөрүлүп келет. Быйыл 4-жолу өтүп жаткан иш-чарага 20дан ашык өлкөдөн 3 миң катышуучу катталган. Анын ичинде Казакстан, Беларусь, Кытай, Өзбекстан, Монголия, Иран жана Кыргызстандан келген алдыңкы спортчулар да бар.
