Түрк парламенти Швецияны НАТОго кабыл алуу боюнча протоколду ратификациялоо үчүн добуш берди. Эми документ өлкө президенти Режеп Тайып Эрдоганга жөнөтүлүп, жакынкы күндөрү ага кол коюусу күтүлүүдө.
Швеция Финляндия менен бирге 2022-жылдын жайында НАТОго кирүү үчүн арыз берген. Бул өлкөлөр альянска кошулууну орус аскерлеринин Украинага толук масштабдуу басып киришинин фонунда чечишти.
2023-жылдын апрелинде НАТОго Финляндия гана кошулган. Түркия Швециянын альянска киришине бир катар шарттарды коюп каршы чыкты. Анкара Стокгольмдон түрк бийлиги террорчулук үчүн айыптаган адамдарды өткөрүп берүүнү, Түркия террордук уюм деп эсептеген Күрдистан жумушчу партиясынын иштерине бөгөт коюуну талап кылды. 2023-жылдын июль айында Эрдоган НАТОнун баш катчысы менен сүйлөшүүлөрдөн кийин Швециянын сунушун колдоого макул болгон.
НАТОго кирүү үчүн талапкер өлкөнүн арызы альянстын бардык мүчөлөрү тарабынан жактырылышы керек. Швециянын арызын ратификациялай элек НАТОго мүчө бир өлкө Венгрия калууда.
