Түркиянын биринчи байкоочу спутниги IMECE 11-апрелде космоско учурулат. Бул тууралуу Түркиянын президенти Режеп Тайып Эрдоган билдирди.
«Биздин биринчи жергиликтүү IMECE байкоо спутнигибиз 11-апрелде орбитага чыгарылат. Биз адам ресурстарыбыз, мүмкүнчүлүктөрүбүз жана технологиябыз менен глобалдык космос жарышында алдыга жылууну улантабыз»,-деп жазды Эрдоган Твиттерде.
Аппаратты Түркиянын космостук технология изилдөө институтунун инженерлери иштеп чыгышкан. Долбоорду ишке ашыруу 2017-жылы башталган.
IMECE – “Tubitak Uzay” космостук технологиялар изилдөө институту тарабынан иштелип чыккан жерди байкоо спутниги. Ал 680 чакырым бийиктикте майда нерселерди жогорку сапатта сүрөткө тарта алат.
Спутник коргонуу секторунун муктаждыктары, табигый кырсыктарды башкаруу жана климаттын өзгөрүшүнө байкоо жүргүзүү үчүн маалымат чогултат. Анын кызмат мөөнөтү беш жыл.
