14-май базар күнү Түркияда президенттик жана парламенттик шайлоо болуп өтөт. Президенттикке аттанган 4 талапкердин бири Мухаррем Инже 11- майда талапкерлигин алып салды. Бүгүн, 12-майда дагы бир талапкер Синан Оган жарыштан чегинээри божомолдонуп жатат. Күрөш Режеп Тайип Эрдоган менен Кемал Кылычтар уулу арасында жүрөөрү белгилүү болду. Элдин тамырын тартып, сурамжылоо жүргүзгөн уюмдар эки талапкердин добушу 52% – 49% болоорун божомолдошууда. Учурда Түркияда шайлоо өнөктүгү катуу жүрүп жатат. Талапкерлердин жыйындарына катышкан калктын саны 1.5 млн адамдан ашты.
Өлкөнүн ички иштер министри Сулейман Сойлуу “оппозиция жеңсе деле бул – саясий төңкөрүш болот”,- деп билдирүү таратты. Түркиянын шайлоо өнөктүгүнө көз салгандар оппозициялык блоктун активдүүлүгү көбүрөөк деген пикирлерин билдиришүүдө.
