АКШ президенти Дональд Трамп кызматка киришип, Вашингтондогу Capital One стадионунда тарапташтарынын алдында алгачкы тогуз жарлыкка кол койду. Биринчи кол коюлган жарлыктардын арасында экс-президент Жо Байдендин учурунда кабыл алынган 78 чечимдин жокко чыгарылышы, ошондой эле АКШнын Париж келишиминен чыгуу чечими бар.
Дональд Трамптын алгачкы буйруктарынын катарында:
Федералдык өкмөттүн ишине толук көзөмөл жүргүзмөйүнчө, бюрократтардын жаңы ченемдик актыларды кабыл алуусуна мораторий киргизүү;
Федералдык өкмөттүн сөз эркиндигин калыбына келтирүү жана цензураны жокко чыгаруу жөнүндө көрсөтмө;
Аскер кызматкерлеринен жана башка кээ бир категориялардан тышкары, мамлекеттик кызматка кызматкерлерди кабыл алууну токтотуу;
Мамлекеттик кызматкерлерге аралыктан иштөө форматынан баш тартып, кеңселерде иштөөгө кайтуу боюнча токтоосуз көрсөтмө берүү;
Федералдык мекемелерге жашоо наркынын өсүшү боюнча көйгөйдү чечүүгө чара көрүүнү тапшырма берүү;
Мурдагы администрациянын саясий оппоненттерин куугунтуктоо үчүн сот системасын колдонууга тыюу салуу;
АКШнын Париж климаттык келишиминен чыгышы тууралуу БУУга кат жөнөтүү.
Трамп документтерди бекитип бүткөндөн кийин буйруктарга кол коюу үчүн колдонулган калемдерди тарапташтарына ыргытып берди. Иш-чарадан соң ал жаңы жарлыктарга кол коюу үчүн Ак сарайга жөнөдү.
