Улуттук коопсуздук мамлекеттик комитетинин СИЗОсунда жаткан Теңгиз Бөлтүрүк эч кандай кыйноолорго кабылган эмес. Мындай маалымат Кыйноолорду алдын алуу боюнча Улуттук борбордун кызматкерлери менен Теңгиз Бөлтүрүктүн жолугушуусунда белгилүү болду. Ал жубайы Илмира Алпыспаеванын билдирүүлөрүн четке какты. Кечээ Илмира Алпыспаева “Назар Ньюс” маалымат агенттигинде пресс жыйын куруп, күйөөсүнүн оң билегинде шишик бар экенин, балким ал кысымга кабылышы мүмкүн экенин божомолдогон. Улуттук борбордун өкүлдөрү менен болгон жолугушууда Теңгиз Бөлтүрүк эч кандай кыйноолорго кабылбаганын айтты.
Эскерте кетсек, Теңгиз Бөлтүрүк “Кумтөр Голд Компани” ЖАКты башкарып турганда мамлекеттик бюджетти 1 млрд сом чыгымга учураткан делип 2022-жылдын 13-сентябрында камакка алынган.
