Казакстандын Улуутау облусунун башчысы Берик Абдыгалиулы өлкөдөгү бир катар аймактардын Совет доорундагы аталыштарын өзгөртүүнү сунуштады. Жезказган каласында өткөн конференцияда “Облус түзүлгөндө Борбордук Казакстан облусу деп атоо боюнча сунуштар болгон. Бирок мамлекет башчысы Касым-Жомарт Токаев адилеттүү жана тарыхый чечим чыгарып, аны Улуутау аймагы деп атаган. Бир эле Улуутау эмес, Жетисуу, Абай аймактары казактын ыйык жерлери жана улуу инсандын аты менен аталды. Бул да жакшы жана шыктандырарлык окуя. Бул демилгени сөзсүз улантышыбыз керек”,-деди ал.
Анын пикиринде, миң жылдык тарыхы бар ыйык жерлердин ысымы берилиши керек. Мисалы, Батыш Казакстан облусун Акжайык району, Чыгыш азакстан облусун Алтай облусу, Түндүк Казакстан облусун Кызылжар району, Павлодар облусун Баянауыл району деп өзгөртүү бардыгына дем берет.
Улуутау облусу 2022-жылдын 8-июнунан бери мамлекет башчысы Касым-Жомарт Токаевдин тапшырмасы менен Казакстанда түзүлгөн үч аймактын бири. Казактар үчүн ыйык болгон бул аймакта илгери маанилүү элдик жыйындар өтүп, хандын ордосу жайгашкан.
