Бозгундагы президент Курманбек Бакиевдин өлкөгө кайтып келиши тууралуу талаш – тартыш кайрадан күчөдү. Буга себеп, “Апрелчилер” коомдук уюмунан бөлүнүп чыккан “Айкөл Ала-Тоо таза коом” уюму мындан 4 ай мурда президент Садыр Жапаровго кат жазганы белгилүү болду. Аталган уюмдун 40 мүчөсү кол койгон кайрылуу катта Курманбек Бакиев 5 млн доллардын тегерегинде кун төлөсө, өлкөгө кайтып келишине уруксат бере тургандарын билдиришкен. Алар белгилегендей, бул каражатка завод, фабрика курулса, миңдеген жумуш орундары түзүлмөк. Бирок, президент маселени талкулоо максатында апрель окуясынын жабырлануучуларын чакырып, кайрылууну окуп берген жана өзүн бул ишке аралаштырбоону суранган. “Айкөл Ала-Тоо таза коом” уюмунун мындай сунушуна апрелчилер каршылык билдиришкенин жабырлануучулар Кубанычбек Дөөлөталиев жана Күмүшай Бокотоновалар билдиришти.
Соңку кабар