Бишкекте ун рыногундагы кырдаалды турукташтыруу боюнча Жогорку Кеңештин депутаттары бүгүн, 21-сентябрда жалпы жыйында көтөрүп чыгышты. Эл өкүлү Тазабек Икрамов Министрлер кабинети кышка даяр эмес экенин белгиледи.
«1 кап унга бир заматта 1 миң сом акча кошулду. Бул өкмөттүн шалаакылыгы. Казакстанга каалагандай суу бердик. Азыр суу жок же ун жок. Күз баштала электе ушундай болуп жатат. Азык-түлүк кымбаттап жатат. Өкмөттү чакырып, маалымат алалы»,- деди ал.
Андан кийин бул маселе боюнча депутат Марлен Мамадалиев ундун аркасы менен нан кымбаттап, артынан кафелер бааны көтөрүп, чынжырлуу болуп жаткандыгын айтты . Ал эми Гүля Кожомкулова Бишкекте ун жарманкелери уюштурулуп жаткандыгы менен аймактар эмне болооруна кызыкты.
