Газа тилкесин көзөмөлдөгөн ХАМАС бардык палестиналыктардын мыйзамдуу өкүлү эмес. Бул тууралуу Палестинанын президенти Махмуд Аббас Венесуэланын президенти Николас Мадуро менен телефон аркылуу сүйлөшкөндө билдирди.
Аббас ошондой эле Газа тилкесиндеги жарандарга жардам берүүнү жана гуманитардык коридорлорду ачууну суранды. Ал Израилдин палестиналыктарга каршы агрессивдүү аракеттерин токтотууга чакырды.
Ошол эле учурда БУУнун баш катчысы Антониу Гутерриш Израилдин жетекчилигине кайрылды. Ал өлкөнүн жетекчилигин Газа тилкесине гуманитардык жүктөрдү жеткирүүгө уруксат берүүгө чакырды.
Гутерриш ошондой эле ХАМАС кыймылын Израилде барымтадагыларды бошотууга чакырды.
«БУУнун Башкы катчысы катары менин милдетим эки гуманитардык кайрылуу жасоо. ХАМАСка – барымтадагылар токтоосуз жана шартсыз бошотулушу керек. Израилге, Газанын карапайым калкынын кызыкчылыгы үчүн гуманитардык жүктөрдү тез жана тоскоолдуксуз жеткирүү үчүн»,-деди Гутерриш.
Анын айтымында, Газада суу, электр энергиясы жана башка маанилүү ресурстар түгөнүп баратат.
