Мыйзамсыз курулган көп кабаттуу турак үйлөрдүн батирлери кардарларга сатылып кеткен болсо, мамлекет ал имаратты бузбайт. Мындай маалыматты архитектура жана курулуш боюнча мамлекеттик агенттиктин директору Нурдан Орунтаев билдирди. Мындай чечимдин кабыл алынышына мамлекет жарандардын кетирген чыгымдарын төлөп бере албаганы менен түшүндүрдү.
Ушундан улам аталган мекемеде жашыл жана кара тизме болоорун, жаңы жылдан кийин өз кызматтарын аткарбаган, лицензияларды арзан баага сатып алып, бекитип отурган жана курулуш эрежелерин сактабаган курулуш компаниялары ошол кара тизмеге, ал эми жашыл тизмеге кызматтарын так аткарган компаниялар киргизилээрин айтты. “Бүгүнкү күндө 1000 сомго алынган лицензиялар 350 миң сомго сатылып жатат. Ошол лицензиялардан салыктык кирешелер түшпөсө, алардын баарын чакыртып алабыз. Учурда өлкө аймагы боюнча 6 миң лицензия берилсе, анын 350 лицензиясы иштелип, калгандары сурмада жатат. Керек болсо, лалафодон сатып алсаң боло турган абалга жетиптирбиз”,- деди Нурдан Орунтаев. Ал лицензия боюнча жумуш татаалданаарын эскертти.
