30-августтан тарта ички иштер органдарынын бөлүмдөрү жана Ички иштер министрлигинин Ички аскерлери күчөтүлгөн тартипте кызмат өтөй баштайт. Бул тууралуу Ички иштер министрлигинен билдиришти.
Маалыматка ылайык, бүгүн, 21-августта министр Улан Ниязбековдун жетекчилиги астында ички иштер органдары тарабынан коомдук тартипти сактоо багытында көрүлүп жаткан ыкчам чаралар, жалпы коопсуздук иштери боюнча, анын ичинде 31-август Эгемендүүлүк күнү, 1-сентябрь окуу жылынын башталышы, 10-сентябрь Бишкек шаарынын Ленин районунда Жогорку Кеңештин депутатын шайлоо жана башка маанилүү иш-чаралар учурунда коопсуздукту камсыздоо туурасында онлайн кеңешме өттү.
Онлайн режиминде өткөн жыйындын ишине министрдин орун басарлары, ИИМдин Борбордук аппаратынын тиешелүү кызматтарынын, Баткен, Ош, Жалал-Абад, Нарын, Ысык-Көл, Талас, Чүй облустарынын, Бишкек жана Ош шаарларынын ички иштер башкы башкармалыктарынын, башкармалыктарынын жетекчилери катышты.
Кеңешмеде коомдук тартипти жана коопсуздукту сактоо боюнча иш-чаралардын планы бекитилип, тартылган ички иштер органдарынын бөлүмдөрүнүн күчтөрүнүн жана каражаттарынын эсеби түзүлдү.
Калкты тез жана сапаттуу тейлөө максатында 28-августта ички иштер органдарынын бардык бөлүмдөрүндө жана бөлүмдөрүндө машыгуулар өткөрүлөт.
Жыйындын жүрүшүндө Кыргыз Республикасынын Ички иштер министрлигинин башкармалыктарынын, кызматтарынын, шаардык аймактык ички иштер органдарынын бөлүмдөрүнүн жетекчилеринин ишмердүүлүгү кеңири талкууланды.
