Борбордук шайлоо комиссиясы Бишкектин Ленин районунда өткөн Жогорку Кеңештин депутаттыгына шайлоонун жыйынтыгын жараксыз деп тапты.
Мындай чечим БШКнын 16-июндагы жыйынында бир добуштан кабыл алынды.
Белгилей кетсек, 28-майда №26 Ленин бир мандаттуу шайлоо округу боюнча Жогорку Кеңештин депутаттыгына кайра шайлоо өткөн. Анда алдын ала маалыматтар боюнча Дамира Ниязалиева жеңишке жеткен. Ал 6 249 добуш(35,86%) алган.
Ал эми БШКнын кийинки отурумда эң көп добуш алган талапкерлер Дамира Ниязалиева менен Улан Сариев “шайлоочулардын добушун сатып алууга” шек саналып, добуштары жокко чыгарылган.
Мыйзам боюнча эгерде шайлоого катышкандардын жалпы санынын үчтөн биринин добуштары жараксыз деп табылса, БШК “шайлоонун жыйынтыгын анык эмес” деген бүтум чыгарат. Эми бир ай ичинде кайра шайлоо өтөт.
