Улуттук коопсуздук мамлекеттик комитети Мамлекеттик мүлктү башкаруу агенттиги тарабынан берилген маалыматты четке кагып, кримтөбөл Камчы Көлбаевге таандык болгон эки автоунааны атайын кызмат албаганын билдирди.
«УКМК буга чейинки ыкчам-тергөө иштерининин жүрүшүндө Көлбаевге таандык унааларды аныктап, бул мүлк боюнча чечим кабыл алуу үчүн аларды Мамлекеттик мүлктү башкаруу агенттигине өткөрүп берген. УКМКнын балансында өзүнүн милдетин аткарууга жетиштүү сандагы автоунаалар бар. УКМК жарандарды чагымчыл мүнөздөгү, такталбаган маалыматтарга ишенбөөгө жана мамлекеттик мекемелердин гана маалыматтарын алууга чакырат”,- деп айтылат билдирүүдө.
17-январда аталган агенттик мурда кримтөбөл Камчы Көлбаевге таандык болгон эки автоунааны президенттин иш башкармалыгы менен Улуттук коопсуздук боюнча мамлекеттик комитетке өткөрүп бергенин билдирген.
Атайын кызмат ага тийиштүү делген жалпы наркы 1 миллиард долларлык активдер камакка алынганын билдирген.
