Кыргызстандагы алгачкы жолу кубаттуулугу 50 мегаватт болгон “Күн булагы” күн электр станциясы курулат. Бул тууралуу Улуттук инвестиция агенттигинин басма сөз кызматы билдирди.
Маалыматка ылайык, долбоор Ысык-Көл районунун Тору-Айгыр айыл аймагында ишке ашырылып жатат. Жалпы инвестициянын көлөмү 35 млн. доллардан ашат. Долбоорду “Күн Булагы” ЖЧКсы казакстандык “TGS-Energy Limited” компаниясы менен биргеликте ишке ашырууда.
Белгилей кентсек, долбоор Кыргызстанда кайра жаралуучу энергия тармагында биринчилерден болуп саналат. Аны ишке ашыруу өлкөдө электр энергиясын өндүрүүнү көбөйтүүгө жана ички керектөөнү жарым-жартылай жабууга жардам берет. Буга чейин аталган компания Тору-Айгыр айыл аймагынан жалпы аянты 80 гектар жер тилкесин алуу боюнча тендерди утуп алган.
“Бүгүнкү күндө инвестор долбоордун техникалык-экономикалык негиздемесин (ТЭО) иштеп чыгып, “Кыргызстандын улуттук электр тармагы” ААКсынан алдын ала техникалык шарттарды алды. Ишкана инженердик-геологиялык жана инженердик-геодезиялык изилдөөлөрдү жүргүзгөн. Жакынкы аралыкта айыл чарбадагы жоготууларды жана алынбай калган пайданы төлөп, ошондой эле айыл өкмөтү менен келишим түзгөндөн кийин ишкана техникаларды алып келип, объектинин курулушун баштайт”, – деп айтылат маалыматта.
