Россиянын Коргоо министрлиги Украинанын учак тибиндеги үч учкучсуз аппараты Москва аймагындагы буталарга сокку уруу аракетин токтотконун билдирди. Аскер күчтөрү кол салууга террордук акт катары баа берди.
Коргоо министрлиги бардык учкучсуз учактар электрондук башкаруу менен басылганын, натыйжада түзүмдөр кыйраганын билдирди. “Ийгиликсиз болгон теракттын натыйжасында жабыркагандар жана кыйроолор жок”,-деп айтылат министрликтин пресс-релизинде.
Москва облусунун губернатору Андрей Воробьев эки учкучсуз учак аскер бөлүктөрүнүн биринин кампаларына жакындап калганын билдирди. Маалымдоо каражаттары эки учкучсуз учак Таман дивизиясынын 15-мотоаткычтар полкунун аймагына конгонун, үчүнчүсү Жаңы Москвадагы Лукино айылына жакын жерде кулаганын кабарлады.
