Кыргызстандын Тышкы иштер министрлиги (ТИМ) Казакстандын тиешелүү органдарынан алынган маалыматтардын негизинде билдирүү таратып, Мангыстау облусунда кулаган учактагы үч кыргыз жаранынын экөөнүн дени сак экенин маалымдады. Ал эми үчүнчү жаран боюнча маалымат такталып жатат.
Маалыматка ылайык, учакта 67 адам болгон, анын ичинде Азербайжандын жарандарынан тышкары Россиянын, Казакстандын, Тажикстандын жарандары жана Кыргызстандын үч жараны болгон.
«Учурда Республикалык штаб түзүлдү, анын курамына Казакстан Республикасынын бардык ыйгарым укуктуу органдары кирди. Кыргыз Республикасынын Казакстандагы Элчилиги кыргыз жарандары тууралуу расмий маалыматтарды алуу максатында Казакстан Республикасынын компетенттүү органдары менен байланышты кармап турат», — деп жазылат маалыматта.
