Германия иш таштоолордун толкунуна дуушар болду. Жүк жана жүргүнчүлөрдү ташуучу поезддердин айдоочулары үч күндүк нааразылык акциясын башташты, бул өлкөнүн бардык аймагында темир жол каттамдарынын үзгүлтүккө учурашына алып келди. Ошол эле маалда немис дыйкандары субсидияларды кыскартууга каршы нааразылык билдирип, жолдорду тосууну улантышууда.
Deutsche Bahn (DB) улуттук темир жол операторунун маалыматы боюнча, алыскы каттамдагы поезддердин 80 пайызга жакыны токтотулган. Чектөөлөр аймактык транспортко да таасирин тийгизет. Машинисттердин профсоюзу эмгек акыны жогорулатууну, жумуш убактысын жумасына 38 сааттан 35 саатка чейин кыскартууну талап кылууда. Deutsche Bahn бул талаптарга жооп бере албасын айтат. Айдоочулардын нааразылыгынан улам миллиондогон жүргүнчүлөр пландарын жокко чыгарууга же көздөгөн жерлерине жетүүнүн башка жолдорун издөөгө аргасыз болушкан. Иш таштоо 10-январда башталып, 12-январда саат 18:00дө бүтүшү керек.
