Иордания Газа тилкесиндеги кырдаал боюнча 18-октябрга белгиленген төрт тараптуу саммитти жокко чыгарганын өлкөнүн тышкы иштер министри Айман ас-Сафадиге шилтеме берүү менен Al-Jazeera телеканалы билдирди.
Жолугушууга АКШнын президенти Жо Байден, Иорданиянын падышасы Абдулла II, Египеттин президенти Абдель-Фаттах ас-Сиси жана Палестинанын башчысы Махмуд Аббас катышмак.
Иорданиянын тышкы иштер министринин айтымында, мындай чечим Палестина, Египет жана АКШ менен кеңешкенден кийин кабыл алынган.
Буга чейин Махмуд Аббас саммитке катышуудан баш тарткан. Муну Газа тилкесиндеги ооруканага кол салууга каршылык иретинде жасаганы кабарланган.
