21-23-июнь күндөрү Кыргызстанга расмий сапар менен келе турган Германия Федеративдүү Республикасынын президенти Франк-Вальтер Штайнмайер ким?
Туулган жери жана ата-энеси
Франк-Вальтер Штайнмайер 1956-жылы 5-январда Детмольддо туулган. Ачык булактарда анын атасы жыгач уста, апасы заводдо иштегени айтылат. Дирк аттуу агасы бар.
Окуу жана жумуш жолу
Франк-Вальтер Штайнмайер Бломбергдеги орто мектепти аяктап, эки жыл аскердик кызмат өтөгөндөн кийин, 1976-жылы Гиссендеги Юстус Либиг университетинен юридикалык билимге ээ болгон. 1980-жылдан бери саясат таануу боюнча да билим алган. Ал 1982-жылы укук боюнча биринчи мамлекеттик экзаменди тапшырып, андан кийин Франкфурт-на-Майне жана Гизен шаарларында практикалык юридикалык билим алган. Ал 1986-жылы укук боюнча экинчи мамлекеттик экзаменди тапшыруу менен бул окууну аяктаган, андан кийин Гиссендеги Юстус Либиг университетинде коомдук укук жана саясат таануу бөлүмүндө илимий кызматкер болуп иштеген. 1991-жылы диссертация үчүн «Үй-жайсыз жарандар – турак-жай менен камсыз кылуу милдети жана турак-жайга укук. Үй-жайсыздыктын алдын алуу жана жеңүүдө мамлекеттин кийлигишүүсүнүн салттары жана келечеги” деген темада ага юридика илимдеринин доктору илимий даражасы ыйгарылган.
Ошол эле жылы Франк-Вальтер Штайнмайер Ганновердеги Төмөнкү Саксониянын мамлекеттик канцеляриясына көчүп барып, ал жерде медиа укук жана саясат бөлүмүнүн ассистенти болуп иштеген. 1993-жылы Төмөнкү Саксониянын губернатору Герхард Шрөдердин кеңсесинин башчысы болгон. Ал кийинчерээк Германиянын федералдык канцлери болгон Герхард Шрөдердин жакын досторунун жана шакирттеринин бири деп аталат. 1998-жылы федералдык канцлердин мамлекеттик катчысы жана федералдык өкмөттүн Федералдык чалгындоо кызматтары боюнча комиссары болуп дайындалган. Ал ошондой эле 1999-жылдан бери Федералдык канцлердин башчысы болуп иштеген.
Франк-Вальтер Штайнмайер 2005-жылы федералдык тышкы иштер министри болуп дайындалган жана 2007-жылдан бери канцлердин орун басары да болуп келген. Германиянын Бундестагынын депутаты. Германиянын Бундестагындагы Германиянын Социал-демократиялык партиясынын депутаттык тобу аны төрагалыкка шайлады. Төрт жылдан кийин ал экинчи жолу федералдык тышкы иштер министри болуп, бул кызматты 2017-жылдын январына чейин ээлеген.
Франк-Вальтер Штайнмайер 2017-жылдын 12-февралында Германия Федеративдүү Республикасынын он экинчи президенти болуп шайланып, 2022-жылдын 13-февралында экинчи мөөнөткө шайланган.
Үй-бүлөсү
Ал 1995-жылы Элька Бүденбендерг менен турмуш курган. Университетте таанышкан жубайы административдик сот болуп иштейт. Алардын Меррит аттуу бир кызы бар.
2010-жылы Штайнмайер ооруп жаткан жубайына бөйрөгүн берип, коомчулуктун жакшы пикирине ээ болгон. Ошол эле учурда ал “бул эрдик эмес, менин жубайыма белек эмес” деп баса белгилеген.
Ал “Газпромдун” Балтика деңизинин түбү менен “Түндүк Агым” газ куурун тартуу боюнча эл аралык долбоорун даярдоого катышкан, Германиянын 2003-жылы Иракка каршы АКШнын аскерий операциясына кошулуусуна каршы болгон. Эң жакшы көргөн фразасы – “Багынуу мен үчүн эмес”.
Хоббиси
Ал саякатка, футболго, адабиятка жана архитектурага кызыгат. Бала кезинде жергиликтүү командада ойногон. Штайнмайердин айтымында, футбол ага команда менен иштөөнү үйрөттү. Классикалык музыканы жана джазды жакшы көрөт.
