Пакистандын Жогорку соту мурдагы премьер-министр Имран Хандын камалышын мыйзамсыз деп тапты.
Чечимде сот саясатчыны токтоосуз бошотулушу керектиги көрсөтүлгөн.
Бир күн мурда Пакистандын соту Ханды сегиз күнгө камоо чечимин чыгарган. Андан кийин өлкөдө массалык нааразылык акциялары башталып, укук коргоо кызматкерлери 2 миңден ашык адамды кармашкан.
Буга чейин Ханга карата бир катар кылмыш иштери козголгон. Тактап айтканда, ал чет элдик лидерлерден белек алып, андан жалпысынан 630 миң долларга жакын киреше тапкан деп шектелген.
