Бүгүн, 30-январда Жогорку Кеңештин жыйынында санариптештирүү министри кызматына Азамат Жамангуловдун талапкерлиги каралып, эл өкүлдөрү макулдук берди.
Адегенде депутаттар талапкерге суроолорду берип, бирок кыргыз тилин жакшы билбегени нааразычылыгын жаратты.
Төрага Тургунбек уулу Нурланбек «Кыргыз тилинде сүйлөп жатканда бир дагы жолу Санариптештирүү деп айткан жоксуз. Жалаң цифровизация, цифровизация дейсиз. Бул министрлик Санариптештирүү министрлиги деп аталат. Жок дегенде министрликтин аталышын толук кыргызча айтпайсызбы? Кыргыз тилинде сүйлөп жатканда жарымынан көбү орусча. Тилди кордоп жатасыз. Тилди бузуп сүйлөгөн мода эмес да, тескеринче акылсыздык болуп жатпайбы?», — деди.
Эске салсак, бир күн мурун президент Садыр Жапаров министр Нурия Кутнаеваны кызматтан алып, анын ордуна Азамат Жамангуловду министрдин милдетин аткаруучу кылып дайындаган.