Борбордук шайлоо комиссиясы 6-июлдагы отурумунда Фарходбек Алимжанов менен Фархат Исмаиловду мандатынан ажыратты.
Учурда мандатынан кол жууган эки депутаттын ордуна парламентке кимдер келээр көпчүлүктү кызыктырууда. Талапкерлердин партиялык тизмесинде «Ата-Журт Кыргызстандан» кийинки орунда Канатбек Маматов, ал эми «Альянста» Элдар Абакиров турат.
«Альянс» партиясынын тизмеси боюнча Элдар Абакиров 2021-жылы өткөн парламенттик шайлоодо 4190 добуш алган. Ал 2016-жылдын май айынан 2019-жылдын июнь айына чейин экономика министринин орун басары болуп иштеген.
Ал эми «Ата журт — Кыргызстан» партиясынан депутаттыкка талапкерлердин тизмесинде кийинки орунда Канатбек Маматов бар. Ал акыркы парламенттик шайлоодо 4347 добуш алган. Канатбек Маматов 2019-жылы Футбол федерациясын жетектеген.
