Жаңы-жылдан кийин медициналык уюмдарды, дарыгерлерди, ооруканаларды кайрадан текшерүүгө алуу талабы айтылды. Бул тууралуу бүгүн, 28-декабрда Жогорку Кеңештин жалпы жыйынында депутат Дастан Бекешев билдирди.
Эл өкүлү операция жасап, дарылаган дарыгерлерди аттестациядан өткөрүүнү жана соттук медициналык экспертизаны жөнгө салууну суранды.
“Мага тишин алдыруу учурунда каза болгон 3 жашар кыздын ата – энеси келди. Али күнгө чейин экспертизанын жыйынтыгы чыга элек экен. Ушул кантип болсун? Медицина бизде начарлады. Жөнөкөй эле операциядан кийин оорулуулар каза болуп жатышат. Туура эмес операция жасап, адам өмүрүн кыйган дарыгерлер камалышы керек. Клиникаларды текшерип чыккыла, суранам”,- деди депутат.
