2022-жылы Кумтөрдөн 17 тонна 305 килограмм алтын казылды. Бул тууралуу Финансы министрлигинин басма сөз кызматы билдирди.
Маалыматка ылайык, күн мурун Жогорку Кеңештин комитетинин жыйынында КР Финансы министрлигинин 2022-жылга республикалык бюджеттин аткарылышы жөнүндө отчету каралды.
Анда депутат Дастан Жумабековдон Кумтөрдөн түшкөн кирешелер жана Кумтөр кенинде 2022-жылга карата алтын өндүрүүнүн көлөмү боюнча суроо берилди.
Финансы министрлиги тактоо иретинде белгилегендей, Кыргыз Республикасын социалдык-экономикалык өнүктүрүүнүн болжолуна (КРМК 2023-жылдын 6-сентябрындагы № 484 токтому) ылайык алтын жана Доре эритмесин өндүрүүнүн болжолдонгон көлөмү 15 862,8 кг, реалдуу 2021-жылга салыштырмалуу өсүү темпи 108,9%.
Ошол эле учурда 2022-жылдын жыйынтыгы боюнча Кумтөрдө алтындын иш жүзүндөгү өндүрүшү 17 305 кг, сатылган алтындын көлөмү 17 284 кг түздү.
Кумтөрдөн 2022-жылга салыктык түшүүлөрдүн иш жүзүндөгү көлөмү 27 959,4 млн сомду түзүп, 2021-жылга карата өсүү темпи 267,3%ды түздү. Салык төлөмдөрүнөн тышкары, Кумтөр төмөнкүдөй милдеттүү төлөмдөрдү жүргүзгөн:
социалдык төлөмдөр;
айлана-чөйрөнү булгоо үчүн төлөмдөр;
суу ресурстарын пайдалангандыгы үчүн төлөм;
айлана-чөйрөнү булгоо үчүн төлөмдөр;
ошондой эле Ысык-Көлдү өнүктүрүү фонду сыяктуу фонддорго төлөмдөр, “Теңир-Тоо” Нарын облусун өнүктүрүү фонду, Аймактарды өнүктүрүү боюнча социалдык өнөктөштүк фонду, Жаратылышты өнүктүрүү фонду ж.б.
