Опузалап пара талап кылган Бишкек шаардык сотунун кылмыш иштери боюнча коллегиясынын судьясы кармалды. Бул тууралуу Улуттук коопсуздук кызматы билдирди.
Маалыматка ылайык, “И.Н.А.” аттуу судья жана дагы бир судья сотто каралып жаткан кылмыш ишинин алкагында эркинен ажыратуу менен байланышпаган оң чечим чыгарып берүү үчүн жактоочунун ортомчусу аркылуу соттолуучунун жакын туугандарынан опузалап 5 миң доллар өндүрүп алган. Коррупциялык схемага “ишенимдүү” делген адвокаттар тартылганы аныкталды.
“Судьялар кеңешинин чечиминин негизинде Бишкек шаардык сотунун судьясы “И.Н.А.” Бишкек шаарынын Биринчи Май райондук сотунун чечими менен 26-ноябрга чейин УКМКнын тергөө абагына камакка алынды”, – деп айтылат маалыматта.
Учурда бул коррупциялык схемага тиешеси бар Бишкек шаардык сотунун башка судьяларын да текшерүү иштери жүрүүдө.
