Өзбекстандын аймагында калган Барак анклавынын тургундары толугу менен Кыргызстанга көчүрүлүп келди. Ал жердеги 97 турак үй менен 8 социалдык объектилер буздурулуп, жооптуу кызматкерлер тарабынан Кыргызстанга ташып жеткирилди. Учурда Барактын 1000 ден ашуун тургуну Кара-Суу районунун Сары-Колот айылынан орун очок алышты. Барак айылы Өзбекстандын Жалал-Кудук менен Коргон-Төбө аймактарынын ортосунда калып, мамлекеттик чек арага 2 км узакта эле. Кошуна өлкө бир тараптуу чек арасын жапканда алар Баткендин Кызыл-Кыя шаары аркылуу өтүп, 300 км жолду басып өтүшчү. Азыр бийлик Барактыктар үчүн Кара-Суунун аймагынан Ала-Тоо жаңы конушун түптөп берүүнү убадалап жатат. Чек араны аныктоо боюнча иш алып барган комиссиянын ишинин жыйынтыгы менен Өзбекстан Барак анклавынын ордуна Кара-Суу районунун чектешкен аймагынан 208 гектар жер бөлүп берген. Президенттин тапшырмасы менен турак жайлар жана социалдык объектилер курулат. Бул үчүн 270 млн сом бөлүнүп берилгени маалым болду.
Былтыр түрмөлөрдө 33 киши көз жумду
Жазаларды аткаруу мамлекеттик кызматынын төрагасы Аскат Эгембердиевдин айтымында, 2023-жылы түрмөлөрдө жалпысынан 33 киши көз жумган. Алардын ичинде 5 киши өздөрүн асып алышкан. “Алар ар кандай ооруларынан улам көз жумушту. Биз саламаттык сактоо министрлиги менен учурда тыгыз иш алып баруудабыз. Бирок, бул көрсөткүч мурдагы жылдарга салыштырмалуу өтө аз”,- деди мекеменин төрагасы. […]
