Чыгыш өнөктөштүк боюнча Европанын тышкы аракеттенүү кызматынын атайын өкүлү Дирк Шубель Грузия келечекте Европа Биримдигине мүчө болоорун билдирди. Бул тууралуу Грузия өкмөтүнүн басма сөз кызматы өлкөнүн премьер-министри Ираклий Гарибашвили менен Евробиримдиктин Чыгыш өнөктөштүк жана Евробиримдикке мүчө мамлекеттер боюнча атайын өкүлдөрүнүн Тбилисиде өткөн сүйлөшүүлөрүнүн жыйынтыгында билдирди.
“Европа Биримдиги Грузиянын жанында турат жана биз келечекте өлкө Евросоюзга мүчө болорунан эч кандай күмөн санабайбыз”,-деди Шубель.
Дипломат ошондой эле Евробиримдиктин 2022-жылдын жай айларында Евробиримдикке талапкер статусун алуу үчүн Грузия ага берилген 12 сунушту канчалык деңгээлде аткаргандыгы тууралуу отчеттун жарыяланышына эки күн калганда атайын өкүлдөрдүн Тбилисиге келиши «жакшы жышаан» экенин кошумчалады.
Шубелдин айтымында, азыр Брюсселде Еврокомиссиянын 8-ноябрда жарыялана турган отчетуна акыркы чекит коюу иштери жүрүп жатат.
