Алматыда Аккент кичи районундагы өрт чыккан турак жай комплексин куруучулар үйдү калыбына келтирүү иштерин өз эсебинен жүргүзүүгө убада берди.
«Биз үйдү калыбына келтирүүгө кеткен чыгымдарды өз мойнубузга алууга даярбыз», – деди курулуш компаниясынын башкы директору Канат Ералиев турак жай комплексинин жашоочулары менен жолугушууда. Ошондой эле курулушчу маркум Асел Бекмухаметованын үй-бүлөсүнө эки бөлмөлүү батир берилерин кошумчалады.
Көп батирлүү турак-жай 2017-жылы пайдаланууга берилген. Маалым болгондой, имаратта 2015-жылы чыгарылган Mitsubishi маркасындагы лифттер орнотулган. Лифттер акыркы жолу ушул жылдын 27-июлунда техникалык кароодон өткөн.
Аккент кичи районундагы өрт 1-август күнү кечинде башталган. 1-кабаттан 16-кабатка чейин электр кабелдери күйгөн. 300 адам эвакуацияланган. Жардам күткөн тургундардын көбү балдары менен терезеден секирип кетишкен. Өрттүн кесепетинен 43 адам жабыркап, бир аял жаракаттардан улам көз жумган.
