“2020-жылы Раимбек Матраимов өзүнүн партиясын парламентке алып келүүгө аракет кылган. Бирок, эл алардын аракетин четке каккандан кийин ал мафия башкача жол менен кетип, кээ бир адамдарын бир мандаттуу округдардан же, башка партиялар аркылуу алып келишкен. Кыргыз парламентинде анын адамдары боо-боо болуп, аттын кашкасындай болуп эле отурушат. Маселен, Искендер Матраимовдон баштасак болот. Алишер Козуев, Надира Нарматова жана Матраимовду айга-күнгө теңеп жүргөн Мейкинбек Абдалиев”,- деп билдирди изилдөөчү депутат Али Токтакунов Азаттык радиосуна берген маегинде.
“Коррупционер экендигин моюндап, бири 8 млн бири 12 млн сом мамбюджетке кусуп, бешенесине “бул коррупционер” деген штамп урулуп калса да, буйтама жолдор менен депутат болуп келген жак жөкөрлөрү бар. Алар Абдувахаб Боронбаев менен Нурлан Ражабалиев. Булар мыйзамдын алкагында жооп бериши керек. Анткени, моралдык жана саясий жоопкерчилик бар”,- деген ал.
