Кытайдын Ханчжоу шаарында өтүп жаткан Азия оюндарында кыргызстандык спортчу Эрлан Шеров дзюдо боюнча чемпион болду. Бул жеңиш Кыргызстандын тарыхында дзюдо боюнча Азия оюндарында биринчи алтын медаль.
Эрлан Шеров 90 кг салмакта беттешкен. Ал таймашты 1/8 финалдан баштап, биринчи беттешинде кытайлык спортчуну жеңген. Андан кийин чейрек финалда ливандык атаандашын уткан. Ал эми жарым финалда БАЭнин спортчусун жеңип, финалга чыккан.
Финалда ал өзбекстандык Давлат Бобоновду утуп, алтын байгенин ээси болгон.
Муну менен Эрлан Шеров Кыргызстан үчүн бул Азия оюндарындагы алгачкы медалды алып келди.
